كل ما كتبه المستشار عن الأسواق

المنطق في الاستثمار مختلف

بتعرف يا صديقي… في سلسلة غريبة جدًا بالرياضيات اسمها سلسلة رامانوجان، بتقول إنه إذا جمعت:
1 + 2 + 3 + 4 … إلى ما لا نهاية، فالجواب مو "لا نهاية" متل ما بقول المنطق البسيط… بل –1/12!

أنا ما رح أفوت معك بتفاصيل الإثبات، لأنه طويل ومعقد، وبتقدر ترجعله وتصفّن فيه قد ما بدك… لكن المهم هون إنو هالقيمة العجيبة مو بس لعبة رياضية.هي نتيجة استخدموها فعلًا بعلم فيزياء الكم، وبـ الديناميكا الكمية، من خلال ظواهر تم إثباتها بالتجربة، مثل تأثير كازيمير.
سلسلة رامانوجان أجبرت الكل—من علماء رياضيات لفيزيائيين—يعيدوا التفكير بمنطق الأرقام… كيف أحيانًا الأرقام، كلما كبرت، بتغيّر تمامًا القواعد اللي تعودنا عليها.ومن هون رح أخدك لأول أساس للاستثمار المثالي

إذا فكرت باستثمار كبير، أو عوائد كبيرة، فالقواعد اللي بتشتغل مع الأرقام الصغيرة… مستحيل تنفعك.
لهيك طبيعي تشوف شركات عملاقة بتنسحب من أسواق ضخمة، أو تتخلى عن استثمارات معينة، وتركّز على استثمار واحد مختلف… قرار قد يبدو غير منطقي لعامة الناس، لكنه منطقي جدًا بالنسبة لأرقامهم.

وعلى هذا الأساس، الاستثمار المثالي مو قرار واضح أو بديهي… بل هو التزام بقواعد وأسس يمكن تبدو "غير منطقية" للوهلة الأولى، لكن مع التعمّق رح تكتشف إنها المنطق الوحيد القادر يوصلك للتعامل مع الأرقام الكبيرة. وهذا اللي رح يوضح أكتر لما نحكي عن مستويات الاستثمار

مستويات الاستثمار

لما نحكي عن الاستثمار، كثير ناس بتشوفه أنه خطوة وحدة: يا استثمرت يا ما استثمرت. لكن الحقيقة يا صديقي إنو الاستثمار درجات، أو خليني قول سلّم، كل درجة فيه بتكسر منطق الدرجة اللي قبلها وهذا ما وضحه روبرت كيوساكي في كتابه ما لا يستثمر به الأغنياء.

أول ما بيبلش أي شخص غالبًا بيبدأ بالادخار. خطوة منطقية جدًا: "خليني أحافظ على فلوسي". لكن مع الوقت بتكتشف إنو المنطق هذا وهم، لأن الادخار هو أبطأ طريق للخسارة… التضخم بياكل الأموال بصمت. ولهيك الناس بتروح للذهب.

هون بتحس حالك عم تنتقل لشيء أكثر أمان، أصل ملموس وتاريخيًا بيحافظ على قيمته. لكن كمان الذهب "غير منطقي" من زاوية ثانية: ما بيجيبلك دخل، مجرد حارس لرأس المال يعني ارتفاع قيمته مو ربح أبداً بنظر بعض المستثمرين وإنما انخفاض لقيمة الدولار

المستوى اللي بعده العقار. هون المنطق بقول إنو إذا عندك أصل ملموس وعم يدر عليك إيجار شهري فأنت بأمان أكتر. وفعلاً هذا صحيح… لكن إذا غصت أعمق بتشوف إنو العقار مو دائمًا منطقي، لأنه بيربطك بمكان، بعوائد ثابتة، وبمخاطر إدارة وتكاليف.

اللي بيتجاوز هالمرحلة بينتقل لخطوة تبدو "غير منطقية" عند الكل وهي تأسيس مشروع. تخيّل إنك تترك استقرار العقار وتدخل مخاطرة مشروع تجاري ممكن ينجح أو يفشل! المنطق البسيط يؤكد أن هذا جنون… لكن الواقع إنو المشاريع هي اللي صنعت ثروات حقيقية.

قفزة المنطق ما انتهت، في مستثمرين بدل ما تتعب بتأسيس مشروع جديد، تروح وتشتري مشروع قائم. الفكرة بحد ذاتها تناقضية لي أشتري شيء جاهز بدل ما أعمله بنفسي؟ لكن هون بالضبط يبان المنطق الجديد... بإنك تنطلق من فكرة تراكمية توفر على حالك عناء قبول الكثير من الأخطاء من خلال الاستعانة بوقت غيرك
وإذا كملت الطريق بتوصل لسوق الأسهم. هون المنطق الشعبي بيصرخ بكلمة"مقامرة!"، بينما المنطق الاستثماري وفقاً للمستويات يقول العكس: الأسهم وسيلة إنك تكون شريك بآلاف الشركات من غير ما تديرها بنفسك.

أعلى درجات السُلّم هي تأسيس مشروع وطرحه للاكتتاب أو بيع أسهمه. فكرة تبدو للوهلة أولى غير منطقية أبداً : تبني مشروع سنين وتتعب عليه… وبعدين تبيعه؟ لكن هون القاعدة تنقلب كليًا: أضخم الثروات بالعالم انبنت على "الخروج" مو على "الاحتفاظ".أي على تأسيس فكرة إبداعية ثم جعل العوام تشتري

الفكرة يا صديقي أن كل مستوى استثماري بيكسر المنطق اللي قبله. ومع كل درجة أعلى، بيبان إنو الشيء اللي كان منطقي تحت… صار عائق وغير منطقي فوق.

وهي بالضبط طبيعة الاستثمار المثالي: رحلة ما بين "منطقي" و"غير منطقي" … تبقى بهذه الرحلة إلى أن تكتشف إنو الغير منطقي هو المنطق الحقيقي بعالم الأرقام الكبيرة.

يتبع... ابقى معنا...

#الذهب #الدولار #الاستثمار #العملات_الرقميه #الفوركس